En la rusia segmento de Interreto lancxigxis nova profesia muzika retejo, ofertanta tutmondan muzikon. La retejo nomigxas Sentero.ru kaj la o-finajxo tute ne estas hazarda koincido - la vorto vere estas inventita helpe de Esperanto-gramatiko. 

Tion oni komprenas ankaux vidante la uzeblajn interfacajn lingvojn de la  retejo: krom la rusa kaj la angla oni havas eblecon elekti Esperanton. La retejo estas absolute profesia kaj kreita sur ege alta nivelo. Impresas ankaux la grandegaj stokoj de tutmonda muziko, acxetebla, provebla kaj senpage elsxutebla de la retejo, kaj la elstara "uz-amikeco". 

La spertaj ret-uzantoj rapide komprenas, ke temas pri plia projekto inter la sukcesegaj kaj jam skandale mondfamaj rusiaj MP3-retejoj. Uzante multe pli  tolereman rusian legxaron pri la auxtoraj rajtoj, la retejoj legale (vidpunkte de la rusia, sed ne de la usona juro) vendas ajnan muzikon kontraux suficxe simbolaj prezoj. La diferenco estas, ke la rusia legxo ne postulas kontrakton inter la vendanto kaj la rajtposedanto, permesante al la vendisto postfakte pagi procentajxon de la konkreta vendoprezo pere de speciala agentejo. 

La usonaj kaj euxropaj rajtposedantoj nun premegas al Rusio, por la rilataj legxoj estu amenditaj kaj certaj striktigoj jam okazis, sed ankoraux ne tiom kruelaj, ke la retejoj igxu eksterlegxaj. 

La E-ajn interfacon kaj la nomon la retejo ricevis dank' al klopodoj de la  projekt-gvidanto, Aleksej Kletsel, rusi-devena israelano, kiu lernis E-on  antaux kelkaj jaroj en la ruslingvaj retaj E-kursoj. La mendinta firmao konsentis pri la propono, opiniante, ke tio aldonos al la projekto iom pli da unikeco. 

Laux Aleksej Kletsel, oni volonte prezentus en la retejo ankaux  E-muzikon. 

Andrej Grigorjevskij 

- la retejo anoncas enhavon de pli ol 500.000 kantoj en mp3 

- adreso de la retejo: http://www.sentero.net/esperanto/ 

fonto: Ret-info: > http://www.eventoj.hu