Fabeloj tradiciaj kaj moderne verkitaj  

Malabundas fabelkolektoj en Esperanto. Por junaj infanoj la rezulto estas, ke tre granda parto de la monda folkloro devas esti perata en la etnaj lingvoj. 

Tra la tuta Euxropo, kaj el tie tra la Amerikoj, Oceanio kaj aziaj landoj, disvastigxis, en nekalkulebla nombro da variantoj, kelkaj fabeloj, kiuj per tio farigxis parto de la folklorstoko de miliardoj da infanoj. Kurioze, laux unua vido, estas, ke neniu definitiva teksto de la fabeloj ekzistas. Kial? Cxar longe, antaux ol esti skribitaj, ili cirkuladis parole kaj tiel akiris multajn formojn.  

Infanoj gxuas auxdi (kaj poste legi) multegfoje la samajn rakontojn. Kiu patr(in)o sukcesis eskapi la cxiuvesperan postulon "Rakontu/legu al mi pri ..."? 

En cxi tiu tre modestaspekta libro ni trovas variantojn de kvin tradiciaj fabeloj, plus du modernajn verkojn fabelkarakterajn: 

1. La Montfort-a anasino. Bela junulino estas kaptita de grafo kaj dorlotata, kvankam mallibera, en luksa cxambro. Sxi votas pilgrimi cxiujare al pregxejo de certa sanktulo, se li ebligos al sxi eskapon. Sxi liberigxas. Post sia morto, en formo de anasino kun idoj, sxi plu plenumas tiun voton. 

2. La blua virbovo. Varianto de la fabelo pri Cindrulino. Servistigitino, per helpo de la spirito de morta blua virbovo, trifoje, elegante vestite, cxeestas meson, kiun cxeestas ankaux princo. La lastan fojon sxi perdas lignan sxuon, kaj la princo gxin trovas. Trovinte, ke nur sxia piedo povas facile eniri gxin, la princo sxin edzinigas. 

3. La regxeto Johano. La plej juna el tri filoj de regxo kompatas malricxan mortinton kaj porpagas lian entombigon. La vulpoforma spirito de la mortinto helpas la junulon akiri turdon, kiu rejunigas, kaj belulinon kun ora hararo. Gajninte ilin, la junulo heredas la regxan kronon. 

4. La sorcxisto Merlino kaj la kavaliroj de la Ronda Tablo. Varianto de la fama legendo pri Regxo Arturo kaj la sorcxisto Merlino. 

5. La faboplanto. Magia faboplanto ebligas al malricxa viro grimpi gxis la cxielo. Tie li petas kaj ricevas, de Sankta Petro, azenon, kiu fekas monerojn. Sed gastejestro sxtelas la azenon. Duafoje la malricxulo petas Sanktan Petron kaj ricevas busxtukon, kiu provizas mangxajxojn. Denove la gastejestro sxtelas. Triafoje la malricxulo petas Sanktan Petron kaj ricevas bastonon, kiu bategas, kiam ordonite. Gxi bategas la gastejestron, kiu devas redoni la sxtelajxojn. 

6. Arzoustaff. Tre cxarma moderna rakonto, verkita de AndrĂ© Ronceray en 1993. Soifanta knabino renkontas ranon en fonto. Post diskutado la rano petas al Thalamis, la regxino de la orkideoj, ke sxi refelicxigu la landon. Thalamis sendas mesagxon, kiu atingas cxiujn akvojn, plantojn kaj bestojn de la regxlando Galezio. Sxi ordonas, ke ili muzikadu por festo en certa vilagxo. Flugkapabla porko portas iliajn reprezentantojn al la festo. Nun cxiujare ili muzikas en la festo kaj gxojigas la landon. 

7. La vera historio de la lupo en la "Lupa Cxambro". Moderna rakonto, verkita de Josette Ducloyer en 2005. Tre mallonga rakonto pri la lasta vivanta lupo. 

Pluraj komposteraroj gxenas legadon de la libro, sed ne suficxe, por senkuragxigi la leganton. La stilo de la rakontoj estas placxa, la enhavo estas klara. Entute, bona kolekto havinda por tiu, kiu amas fabelojn kaj/aux devas kontentigi siajn infanojn per fabeloj. 

Donald BROADRIBB 

Jean-Pierre Ducloyer: Bretonaj fabeloj. 1 â€" En Broceljando. Eld. FEB, Rennes (Francio), 2007. 77 pagxoj vinktitaj. ISBN 2-9520978-3-6. 

Prezo cxe FEL: 7,79 euxroj + afranko. 

Por mendi, vi krozu al la Retbutiko:  http://www.esperanto.be/cgi-bin/mal/Web_store/web_storeie.cgi?keywords=breton... 

From: "Retbutiko de FEL" <retbutiko@fel.esperanto.be