Doktorigxis en la Universitato de Amsterdamo la iama estrarano de
"Esperanto Nederland" kaj de Internacia Esperanto-Instituto (IEI), Wim
Jansen, docento pri interlingvistiko kaj Esperanto en tiu sama universitato.
Por atingi tiun cxi rezulton Jansen faris esploron pri vortordaj aspektoj
troveblaj en la nuntempa, jxurnalismeca lingvajxo kaj publikigis pri tio
disertacion, kiun li sukcese defendis la 2-an de oktobro.
La doktorigaj akompanantoj estis la profesoroj Hengeveld (por la generallingvistika
parto) kaj Van Oostendorp (por la gxenerallingvistika kaj por la esperantologia aspektoj).
En la doktoriga komisiono sidis i.a. prof. Haase
de la Universitato de Bamberg, Germanio. La ceremonion cxeestis pluraj
konataj esperantistoj el Nederlando kaj ekstere. La 283-pagxa disertacio estas verkita en la nederlanda lingvo kaj proponas
resumojn en la angla, Esperanta kaj germana lingvoj.
Temas pri la dua disertacio pri Esperanton rilatanta temo defendita en nederlanda
universitato ene de unu jaro (post Marcus Sikosek, doktorigxinta en
novembro 2006 post esploro pri la historio de UEA), sed pri la unua
disertacio post 1947(!), kiu rekte koncernas la lingvon mem.
Estas antauxvideble, ke la Universitato de Amsterdamo baldaux nomumos Jansen
plenrajta speciala profesoro en la katedro, kiun li de 2004 okupas en la
nomo de IEI.
La teksto de la disertacio estas libroforme acxetebla cxe IEI kontraux
25,20 EUR. Informis Atilio Orellana Rojas iei001@tiscali.nl
fonto: Ret-info: http://www.eventoj.hu
|
